\n
Amakuru yihuse kandi yizewe

Home > Imibereho myiza > Ibisabwa kugirango umurwayi wa COVID yitabweho ari mu rugo n’imiti (...)

Ibisabwa kugirango umurwayi wa COVID yitabweho ari mu rugo n’imiti yamuvura

Saturday 29 August 2020, by sereine

Icyorezo cya COVID-19 kugeza ubu ntikirabonerwa umuti cyangwa urukingo, ku buryo umuntu wanduye, kugira ngo yitabweho akurwa mu bandi ngo adakwirakwiza uburwayi, agafashwa binyuze mu kuvura ibimenyetso bya Coronavirus, kugeza umubiri wiremyemo ubudahangarwa, ya virusi igashira mu mubiri.

Ubwo umurwayi wa mbere yagaragaraga mu Rwanda ku wa 14 Werurwe 2020, bakomeje kwiyongera, bitangira u Rwanda rufite ibigo bibiri byita ku banduye COVID-19 biri mu Mujyi wa Kigali.

Minisiteri y’Ubuzima ivuga ko uko uburwayi bwiyongeraga, ibigo byashyirwagamo abanduye byaje kurengerwa, bituma bimwe mu bigo nderabuzima n’amashuri bihindurwa aho kuvurirwa COVID-19, bijyanye n’umubare w’abarwayi.

Inyandiko Minisiteri y’Ubuzima yashyize ahagaragara ivuga ko kugeza ku wa 21 Nyakanga 2020, mu Rwanda hari ibigo 18 bivurirwamo abanduye COVID-19, birimo ibigo nderabuzima icyenda n’amashuri arindwi, byose hamwe bifite ubushobozi bw’ibitanda 1986.

Guhera ku wa 1 Kamena 2020, nyuma y’ubwandu hagati mu baturage mu Karere ka Rusizi, imibare y’ubwandu yarazamutse cyane, ndetse bijyanye n’ifungurwa ry’ingendo z’indege zitwara abagenzi n’ubukerarugendo bw’imbere mu gihugu na mpuzamahanga, birashoboka ko ubwandu bwa COVID-19 buzakomeza kwiyongera.

Hatekerejwe kuvurira mu rugo abanduye COVID-19

Minisiteri y’Ubuzima ivuga ko guhindura ibigo nderabuzima ibivurirwamo COVID-19, ari imbogamizi ku bakeneye serivisi z’ubuzima zahatangirwaga, kandi zigomba gukomeza no mu bihe by’icyorezo, hirindwa ko ibibazo byabishamikiraho.

Ikomeza iti “Mu gihe igihugu kigenda gifungura ubukungu gahoro gahoro, amashuri, amahoteli, serivisi za leta n’abikorera bikeneye kongera gukora, ku buryo bitashoboka ko hakomeza gukoreshwa nk’ibigo bivurirwamo. Hakenewe uburyo burambye butuma serivisi zose zikomeza zaba iza leta n’abikorera, by’umwihariko serivisi z’ubuzima.”

Uburyo bwatekerejweho bwo kuvurira abantu mu ngo bwitezweho ko “buzanagabanya ikiguzi gihanitse bisaba Guverinoma y’u Rwanda mu kuvurira ubuntu no gushyira mu kato abaturage bose n’abanyamahanga.”

Minisiteri y’Ubuzima ivuga ko nibura 70% by’abasangwamo COVID-19 nta bimenyetso baba bagaragaza, ku buryo baba bakeneye gusa kuvanwa mu bandi, bagakurikiranwa mu buryo bworoheje, ku buryo byanabera mu ngo zabo.

Hanzuwe ko abataragaza ibimenyetso aribo bazajya bemererwa kwitabwaho bari mu ngo, naho abanduye COVID-19 basanganywe ubundi burwayi bukomeye, kimwe n’abafite ibimenyetso by’uburwayi, abe aribo bashyirwa mu ivuriro nk’uko bisanzwe.

Si buri wese ubyemererwa

Minisiteri y’ubuzima ivuga ko umuntu ukurikiranwa ari iwe igihe yanduye COVID-19, agomba kuba yemera kuguma iwe ubutahava, kugeza abiherewe uburenganzira n’inzego z’ubuzima.

Agomba kandi kuba atagaragaza ibimenyetso by’uburwayi cyangwa afite ibyoroheje, afite munsi y’imyaka 65, kandi akaba afite ahantu hisanzuye yaguma, adahura cyane n’abandi mu rugo.

Gusa umuntu yemererwa hamaze gukorwa isuzuma ry’aho atuye, nyuma y’isesengurwa ryimbitse ry’abaganga n’ubuyobozi bw’inzego z’ibanze.

Harebwa ko mu rugo nta muntu ufite ibyago byo kuzahazwa na COVID-19 nk’urengeje imyaka 65 cyangwa ufite indwara zikomeye nk’umutima, ibihaha, impyiko n’izindi.

Minisiteri y’Ubuzima ikomeza iti “Hagomba kuba hari ubwiherero buhagije n’ubwiyuhagiriro mu rugo, hari icyumba cyihariye gifite umwuka uhagije cyangwa ahantu hihariye umurwayi ashobora gukirira, atahasangira n’abandi bantu.”

Hagomba kandi kuba hari umuntu mukuru umukurikirana, kandi umurwayi akaba afite uburyo butekanye bwo kugezwaho amazi n’ibiribwa.

Biteganywa ko igihe byemewe, icyumba umurwayi abamo kigomba kuba gifite umwuka uhagije, inzugi n’amadirishya bigahora bikinguye, akagira ahantu hihariye ashyira udutambaro, udupfukamunwa n’indi myanda ye, kandi igatwarwa ahantu hihariye kuko iba irimo uburwayi.

Hagomba kuba hari uburyo bwo gukaraba intoki n’amazi meza n’isabune cyangwa umuti usukura intoki.

Muri icyo gihe nta muntu uba wemerewe kuva mu rugo, abashyitsi baba babujijwe kugeza umurwayi akize, kandi abagize urugo bose bagategekwa kwambara udupfukamunwa, naho uwita ku murwayi wa COVID-19 akaba yambaye agapfukamunwa kagenewe abaganga, naho abandi bashobora kwambara udusanzwe.

Ni ngombwa kandi guhana intera ya metero ebyiri hagati y’umuntu n’undi, bakirinda kwikora mu isura kandi bagakaraba kenshi amazi meza n’isabune.

Umurwayi kandi agira ibikoresho ariraho bisukurwa hakoreshejwe chlorine 0.05% bishyirwaho mu gihe nibura cy’iminota 30, hakabona kujyaho amazi meza n’isabune.

Isuku yo mu rugo

Biteganywa ko mu rugo haba hagomba gusukurwa mu buryo buhoraho cyane ha hantu, byoroshye ko abantu bakora inshuro nyinshi, hagasukurwa n’amazi meza n’isabune cyangwa umuti uterwa mu nzu, ariko mu cyumba cy’umurwayi, hatangwa inama ko ari we uhisukurira.

Minisiteri y’Ubuzima ikomeza iti “Ubwogero n’ubwiherero bikwiye gusukurwa kandi bigaterwa umuti nibura kabiri ku munsi. Niba uwanduye COVID-19 asangira ubwogero n’abandi, bukwiye guterwa umuti nyuma yo kubukoresha.”

Ni ngombwa kandi kwifashisha uturindantoki, byaba byiza tukaba udukoreshwa rimwe, kandi tugahita dushyirwa ahabigenewe.

Imyanda ibikwa mu kintu gifungwa neza, naho ibyo umurwayi asigaje kurya bikamenwa ahantu hizewe, kandi ibyo yaririyeho cyangwa yanywereyeho, bigasukurwa neza na Chlorine, nyuma hakajyaho amazi meza.

Amashashi arimo ya myanda yanduye ivanwa mu rugo n’umukozi w’inzego z’ubuzima, akayijyana ku kigo nderabuzima ahateganyijwe.

Ikigo cya Kanyinya cyari Ikigo Nderabuzima kivurirwamo indwara zinyuranye, ubu cyahariwe abarwaye COVID-19 gusa
Imiti yifashishwa n’umurwayi

Abarwayi bakangurirwa kunywa amazi menshi, gukaraba intoki kenshi kandi bakagira isuku mu myanya y’ubuhumekero.

Igihe umuntu agaragaje umuriro, hatangwa inama zo gufata imiti yo mu bwoko bwa antipyretic, cyangwa umuntu agafata analgesics igihe afite ububabare, akeneye kubugabanya. Gusa abaganga babuza imiti nka Ibuprofen.

Antibiotics nazo ngo ntizemewe, kereka iyo umuntu agize umusonga, kandi ngo umuntu ashobora gufata imiti ya Augmentin cyangwa ceftriaxone/doxycycline.

Minisiteri y’Ubuzima ivuga ko muri icyo gihe, umurwayi aba akurikiranwa n’abaganga binyuze mu kumuhamagara kuri telefoni. Agenda yipima umuriro afite, akamenyesha abaganga muri cya kiganiro bagirana. Abaganga kandi bamubaza uko amerewe, hirindwa ko yaremba.

Mu bimenyetso bigenzurwa cyane harimo kureba ko umuriro utarengeje iminsi itatu utarimo kugabanywa na antipyretics, ni ukuvuga warenze dogere Celsius 38. Ni igihe kandi aba arimo guhumeka yihuta, agira ikibazo mu guhumeka, akagira n’inkorora.

Umuntu yemererwa kuva muri ubwo buryo iyo bigaragaye ko ameze neza mu gihe cy’amasaha 48, amaze iminsi nibura 14 mu rugo hatitawe ku gihe yamereye neza, no kuba yafashwe igipimo kikagaragaza ko nta COVID-19 akirwaye, hakoreshejwe igipimo cyimbitse kizwi nka RT–PCR (Reverse transcription polymerasechain reaction).

Mu gihe mu rugo hari umurwayi urimo kwitabwaho, abahaba bose baba bafatwa nk’abahuye nawe, ku buryo nabo baba bari mu kato, bagakurikiranwa kuri telefoni kugeza igihe cyagenwe kirangiye.

Ibyo bivuze ko nta muntu wo muri urwo rugo uba wemerewe kurenga imbago z’urugo cyangwa guhura n’abandi bantu.

Biteganywa ko RBC ikorana n’izindi nzego zirimo Komisiyo y’Igihugu y’Abana na Minisiteri y’Uburinganire n’Iterambere, kugira ngo abana bitabweho mu isesengura ry’igihe umubyeyi agiye kwitabwaho mu rugo cyangwa ajyanwe mu ivuriro.

Biteganywa kandi ko mu isesengura, abatujuje ibituma bavurirwa mu rugo bashyirwa ahantu hihariye, haba nk’inzu rusange, urusengero cyangwa ahandi ku rwego rw’Umurenge cyangwa Akagali, hakoreshwa mu kwita ku banduye COVID-19.

Muri icyo gihe kandi ubuyobozi bw’inzego z’ibanze bugira uruhare mu gukurikirana ko akato kubahirizwa.

Umuyobozi Mukuru w’Ikigo cy’Igihugu cy’Ubuzima, Dr Nsanzimana Sabin, aheruka gutangaza ko hari benshi bamaze gukira bitaweho muri ubu buryo, haba mu Mujyi wa Kigali no mu Karere ka Rusizi.

Ati “Arakurikiranwa, hari akantu tumwambika kugira ngo atazajya azerera akajya kwanduza abandi, ni agasaha keza, karanabara, ukabikurikirana, utazamubwira ngo guma mu rugo ejo ukabona atwaye moto Kimironko cyangwa yaje gukoresha ikiganiro mu itangazamakuru. Barakize i Rusizi, barakize hano i Kigali, bakiriye mu ngo zabo. Abo rero kubakurikirana ni ngombwa, kuko hari abagize umuriro, hari utangira kubura umwuka akaguhamagara akakubwira ati nubwo ndi mu rugo ariko nimutabare bimeze nabi, mukagenda mukamufata, mukajya kumuha umwuka.”

Ni uburyo buzatuma abarwayi barembye aribo bajya mu mavuriro, maze ibikorwa remezo byahinduwe aho kuvurira COVID-19 byongere bikoreshwe icyo byagenewe.

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

Hypertext link

(If your message refers to an article published on the web or to a page providing further information, please enter the title of the page and its URL below).