\n
Amakuru yihuse kandi yizewe

Home > Iyobokamana > Itorero rya Pentekote ryo mu Rwanda, ADEPR ryateguye amasengesho y’iminsi (...)

Itorero rya Pentekote ryo mu Rwanda, ADEPR ryateguye amasengesho y’iminsi 70

Friday 30 October 2020, by sereine

yo gushaka Imana n’umutima wose, amasengesho rivuga ko ashingiye ku ijambo ry’Imana riboneka mu gitabo cy’umuhanuzi Yeremiya 29: 13 rigira riti "Muzanshaka mumbone, nimunshakana umutima wanyu wose" nk’intego yayo.

Nkuko bigaragara mu nyandiko imenyesha aya masengesho yashyizweho umukono ku wa 23 Ukwakira 2020 na Pasiteri Ndayizeye Isaïe ubu uhagarariye iri torero no mu rwego rw’amategeko, aya masengesho azatangira ku itariki ya 01 Ugushyingo 2020 asozwe ku itariki ya 10 Mutarama 2021 ubwo iminsi 70 izaba yuzuye.

Iyi nyandiko yashyikirijwe Abashumba b’Indembo b’agateganyo bose, ikomeza igaragaza ko aya masengesho ateganyijwemo inyigisho ku bayobozi n’abakirisito bose b’Itorero rya Pentekote ryo mu Rwanda, ADEPR nkuko iyi nyandiko UMUBAVU wabonye ibigaragaza.

Muri aya masengesho harimo iminsi yo kwiyiriza ubusa kuri buri cyiciro hagafatwa ifunguro rimwe ku munsi, nko kuva ku itariki ya 01 Ugushyingo 2020 kugeza ku wa 08 Ugushyingo 2020 aho abarimo abakirisito n’abayobozi bazafata umwanya wo kwihana no kugira umutima mushya nkuko bigaragara ku mugereka w’inyandiko ivuga aya masengesho.

Muri iyi nyandiko kandi bigaragara ko buri cyiciro mu Itorero kizagira igihe gihagije cyo gusenga no kwegerana n’Imana kandi ngo nyuma buri Mushumba w’Itorero ry’Akarere akazageza raporo yihariye y’aya masengesho ku Rurembo igaragaza uko yagenze n’umusaruro wavuyemo, iyi raporo ikazanatangwa ku buyobozi bw’Itorero ku rwego rw’igihugu.

Mu kwirinda icyorezo cya COVID-19 u Rwanda n’isi yose bakomeje guhangana na cyo, ubuyobozi bw’Itorero ntibwabyirengagije kuko busaba abashumba kumenyesha abakirisito ko guteranira hamwe bitemewe keretse ngo gusa ku bafunguriwe insengero mu gihe abandi ngo bazayasengera aho bari mu mago yabo.

Abandi kandi basabwe kuzakoresha uburyo bwari busanzwe bukoreshwa muri iki gihe nk’ubw’ikoranabuhanga ndetse no gukoresha Radiyo y’Itorero, Life Radio, kuri YouTube, ku magurupe ya WhatsApp mu kwirinda COVID-19.

Aya masengesho ateguwe nyuma yuko ADEPR ihawe ubuyobozi bw’inzibacyuho mu gihe cy’umwaka wose burangajwe imbere na Pasiteri Ndayizeye Isaïe wagizwe Umuyobozi wa Komite y’Inzibacyuho; Pasiteri Rutagarama Eugène umwungirije; Umuyobozi Nshingwabikorwa, Pasiteri Budigiri Herman;Umuyobozi ushinzwe Umutungo, Imari n’Imishinga, Umuhoza Aurélie n’Ushinzwe Abakozi n’Ubutegetsi, Gatesi Vestine.

Ubu buyobozi bushya bw’iri torero bwatangajwe ku wa 8 Ukwakira 2020 n’Urwego rw’Igihugu rw’Imiyoborere, RGB, ari narwo rufite mu nshingano imiryango itari iya leta irimo n’ishingiye ku myemerere nka ADEPR. Hari nyuma y’iminsi mike ikuyeho ubuyobozi bw’uyu muryango kubera ko butabashije kubahiriza inshingano ziteganywa n’amategeko.

Iyi Komite y’Inzibacyuho ya ADEPR mu gihe cy’amezi 12 byavuzwe ko ashobora no kongerwa, yahawe inshingano z’ingenzi zirimo kuvugurura imiyoborere, amategeko, inzego z’imiyoborere n’inzego z’imirimo ndetse n’imikorere n’imikoranire muri ADEPR, no gushyiraho uburyo buhamye kandi butanga umuti urambye wo kubaka ADEPR.

Iyi Komite yanasabwe kandi gukoresha igenzura ry’imikorere, abakozi n’umutungo bya ADEPR kugira ngo rifashe muri ayo mavugurura no kwemeza no gushyira mu bikorwa amavugurura muri ADEPR.

Ubwo hashyirwagaho iyi Komite, Pasiteri Ndayizeye Isaïe uyirangaje imbere wari usanzwe ari umushumba muri ADEPR Ntora English Church, yashimiye abagaragaje ituze mu gihe itorero ryari mu bibazo.

Mu kiganiro aba bayobozi b’Inzibacyuho mu Itorero rya ADEPR bagiranye n’itangazamakuru ku wa 23 Ukwakira 2020, batangaje ko ngo gusenga Imana ari yo ntwaro ikomeye muri enye biteguye gukoresha mu kuzana impinduka nziza mu itorero kuko ngo ADEPR ari itorero aho kuba ikigo cy’ubucuruzi.

Pasiteri Ndayizeye Isaie yabwiye abanyamakuru ko hari ibintu bine bagiye kwibandaho kugira ngo babashe gutanga umusaruro w’impinduka bitezweho muri iki gihe cy’inzibacyuho y’umwaka umwe.

Ati ”Ni ibintu bine twifuza gukoresha, kimwe ni uko tugiye gufata umwanya wo gusoma inyandiko zihari, amategeko, kureba n’izindi nama zabaye kugira ngo turebe ikintu abakirisitu bakeneye ko gihinduka.”

Yakomeje agira ati “Intambwe ya kabiri ni ukumva abantu: kumva abantu badushaka, abaduhamagara, abatwandikira, batubwira ibintu bumva byahinduka.”

Ikindi ni uko ngo bagiye guhuza amatsinda y’abantu batandukanye mu byiciro byose by’itorero, urubyiruko, abagore, abapasitoro, abari mu kiruhuko cy’izabukuru, kugira ngo bumve ibitekerezo byabo ku mpinduka zikenewe ubundi bahuze ibyo bitekerezo babishyire mu bikorwa.

Ingingo ya Gatatu izibandwaho ngo ni ugukora igenzura (audit) mu buryo bunyuranye.

Ati “Iyo tuvuze igenzura hari igihe abantu bumva amafaranga gusa ariko ikorwa mu buryo butandukanye, hari abakozi, hari imirimo, uburyo ibintu bikorwa, uburyo amafaranga akoreshwa, ibikorerwa abakirisitu n’ibindi.”

Icya Kane yavuze ko ari na cyo gikomeye ni ugusenga Imana. Ati “Ikindi tuzakoresha ni ugusenga Imana kuko nk’abakirisitu iri ni itorero ntabwo ari ikigo cy’ubucuruzi turimo kubaka, kandi tuzi ko muri Kirisitu ari ho itorero ryubatse.”

Aba bayobozi bavuze ko impinduka zikenewe zidakwiye gushingira ku kuntu bo nk’abayobozi bumva ibintu, ahubwo ngo zikwiye gushingira ku buryo bwiza kandi burambye.

Umuyobozi Nshingwabikorwa wa ADEPR, Pasiteri Budigiri Herman, we muri iki kiganiro n’abanyamakuru, yavuze ko biteguye gukomeza kwishyura umwenda ADEPR yafashe yubaka Dove Hotel, gusa yirinze kugira byinshi avuga kuri iyi myenda.

Muri iki kiganiro ni na bwo iyi Komite y’Inzibacyuho yahishuye ko ngo mu kwita ku buzima bw’iby’umwuka, hagiye gukorwa amasengesho y’iminsi 70 ariyo aya azatangira ku itariki ya 1 Ugushyingo 2020 akazasoza ku wa 10 Mutarama 2021 kuko ngo bifuza ububyutse no gufashwa n’Imana mu rugendo rwo kuzahura ADEPR.

Itorero rya Pentekote ryo mu Rwanda, ADEPR, rimaze imyaka 80 rikorera mu Rwanda aho rifite abakristo basaga Miliyoni ebyiri mu gihugu hose. Ryatangiriye i Gihundwe mu Karere ka Rusizi mu mwaka wa 1940 rizanywe n’abamisiyoneri b’Abanyasuwede.

Any message or comments?

pre-moderation

This forum is moderated before publication: your contribution will only appear after being validated by an administrator.

Who are you?
Your post

To create paragraphs, just leave blank lines.

Hypertext link

(If your message refers to an article published on the web or to a page providing further information, please enter the title of the page and its URL below).